Caldas
de Reis (Pontevedra)
14/12/2018
COMUNICADO DA COORDINADORA ANTI-ENCORO DO UMIA
A Coordinadora considera que as declaracións do profesor da USC
Fernando Cobo na entrevista publicada no xornal Faro de Vigo sobre
o mal estado da auga do Umia e a súa perigosidade veñen a ratificar
as súas denuncias sobre as mentiras da Xunta cando asegura que a
saúde das persoas non corre perigo polo consumo da auga do encoro.
Asimesmo tamén veñen a acreditar ditas declaracións que non hai máis
solución para a erradicación da cianobacteria que deixar que a auga
do río circule libremente, o que non resulta posible namentras
exista esa barreira artificial que representa o encoro.
Desde o ano 1999 a Coordinadora, asesorada por científicos de
prestixio de diversas Universidades e centros de investigación
(Univ.Santiago, Coruña, Vigo, Zaragoza, Granada, CSIC, COAGRET …
etc.) ten denunciado o cúmulo de irregularidades de todo tipo desde
a publicación do anteproxecto do encoro, advertindo do que ía a
suceder.
Para a Coordinadora a recuperación do río e o dereito a dispor de
auga salubre non pasa por remendos de ampliacións da depuradora ou
similares. A recuperación do río pasa polo desmantelamento do encoro
e a iso están encamiñados todos os seus esforzos.
Informan que o vindeiro día 22 finaliza o prazo para que a Xunta de
Galicia lles facilite o informe preceptivo que se recolle no
condicionado da Declaración de Impacto Ambiental de 1996, que debe
de elaborarse en supostos excepcionais como a aparición da
cianobacteria e darlle traslado ó órgano ambiental para a adopción
de medidas.
A solicitude deste informe fíxose ó amparo da Lei 27/2006, de 18 de
xullo, pola que se regulan os dereitos de acceso á información, de
participación pública e de acceso á xustiza en materia de medio
ambiente, que incorpora as Directivas 2003/4/CE e 2003/35/CE, así
como do disposto no artigo 26 da Lei 1/2016, de 18 de xaneiro, de
Transparencia e Bo Goberno e a non entrega do mesmo suporía a
vulneración de dúas normas de soporte comunitario, polo que
esixirían a depuración das responsabilides a que houbera lugar nas
instancias correspondentes.
Caldas de Reis 14/12/18
Coordinadora Antiencoro do Umia
Enderezo postal: Rúa José Salgado N-4.2 – CP 36650 Caldas de Reis
(Pontevedra)
Tlfnos. 630830815 -
rioumia@hotmail.com
/elenavaz/index.htm
Saír.